English   

బయోపిక్ విజయం సాధించాలని ఎన్టీఆర్ కోరుకోరట !

jr ntr speech at ntr biopic audio launch function
2018-12-22 02:35:54

నిన్న అత్యంత కన్నుల పండుగగా నందమూరి బాలకృష్ణ లీడ్ రోల్‌లో నటించిన ‘ఎన్టీఆర్ బయోపిక్’ మూవీ తొలి భాగం కథానాయకుడు ఆడియో రిలీజ్ ఈవెంట్‌ జరిగిన సంగతి తెలిసిందే. ఈ వేడుకలో పాల్గొన్న ఎన్టీఆర్ నందమూరి అభిమానుల్లో ఊపు తెచ్చే ప్రసంగంతో ఆకట్టుకున్నారు. ఎన్టీఆర్ మాట్లాడుతూ.. ‘నందమూరి కుటుంబ అభిమానులకు ధన్యవాదాలు. నా పక్కన బాబాయ్ ఇలా నిలబడితే, ఇన్ని రోజులు బాబాయ్ కనిపించే వారు ఇప్పుడు పెద్దాయన గుర్తొస్తున్నారు. మాటలు తడబడితే క్షమించండి అంటూ మొదలు పెట్టిన తారక్, నేను ఈ రోజు ఆ మహామనిషి కుటుంబంలో ఒక వ్యక్తిని కావడం ఎంత గర్వకారణమో.. కానీ, నేను ఈ రోజు కుటుంబ సభ్యుడిగా మాట్లాడటానికి ఇక్కడకు రాలేదు. ఒక మహానుభావుడు చేసిన త్యాగాల వల్ల లబ్ధి పొందిన ఒక తెలుగు వాడిగా మాట్లాడటానికి ఇక్కడకు వచ్చా. ఎందుకంటే.. చిన్నప్పుడు తెలిసి తెలియని వయసులో తాతయ్య గారూ అని సంబోధించిన నేను.. ఆయన గురించి తెలుసుకున్న తరువాత రామారావుగారు, అన్నగారూ అని సంబోధించడం మొదలు పెట్టా. ఎందుకంటే ఆయన ఒక కుటుంబానికి సంబంధించిన వ్యక్తి కాదు. తెలుగు వాడిగా పుట్టిన ప్రతి ఇంటికి, తెలుగు వాడిగా పుట్టిన ప్రతి వ్యక్తికి చెందిన ధృవతార ఎన్టీఆర్. ఎన్నో కథలు విన్నాను ఆయన గురించి.. నాన్న, అన్న, బాబాయ్ చాలా చెప్పారు. కానీ, ఆయన గురించి ఎంత విన్నా ఇంకా తెలుసుకోవాలనిపిస్తుంది. ఆయన ఒక గొప్ప కొడుకే కాదు.. ఒక గొప్ప తండ్రే కాదు.. ఒక గొప్ప నటుడే కాదు.. ఒక గొప్ప నాయకుడే కాదు.. వీటన్నింటి కంటే ముఖ్యం. తెలుగు వాళ్లు అని కూడా మనల్ని సంబోధించని రోజుల్లో.. పక్క రాష్ట్రాల పేరుతో మనల్ని పిలుస్తున్న రోజుల్లో.. ఇదిరా తెలుగు వాడి గౌరవం. ఇదిరా తెలుగువాడి పౌరుషం. ఇదిరా తెలుగు వాడి ఖ్యాతి అని తొడకొట్టి ఈ రోజు తెలుగు వాళ్లమని మనం గర్వంగా చెప్పుకుంటున్నాం అంటే.. ఎంతో మంది త్యాగాలు చేశారు అందులో నందమూరి తారకరామారావు గారు ప్రముఖులు. ఇది నాకు తెలిసింది. రేపటి రోజున మా పిల్లలు మమ్మల్ని అలాంటి ధర్మ మూర్తి ఉన్నాడా అని అడిగితే.. అప్పుడు గర్వంగా చెబుతా ఇంకా పుట్టలేదేమో నాన్నా.. కానీ, మా తాత గురించి మీ తాత చిత్రం చూపించమని చెప్తా వాళ్లకి నేను. ఆ మహానుభావుడి చరిత్రను మా తరానికి, ముందు తరాలకు తీసుకెళ్తున్న బాబాయ్ బాలకృష్ణ గురించి ఎంత చెప్పినా సరిపోదంటూ భావోద్వేగం చెందారు. ఎన్టీఆర్ ది ఓ చరిత్ర అని, ఇటువంటి చరిత్రను భావితరాలకు అందిస్తున్నందుకు ఇది విజయం సాధించాలని తాను కోరుకోనని, ఎందుకంటే, ఎన్టీఆర్ విజయం సాధించడం వల్లే ఈ బయోపిక్ మొదలైందని, చరిత్రకు విజయాలు, అపజయాలు ఉండవని, కేవలం చరిత్ర సృష్టించడమే ఉంటుందని అన్నారు. బాబాయ్ చేసిన ఈ ప్రయత్నానికి ఆయన కన్న ఈ కలకి వెన్నెముకగా ఉన్న దర్శకుడు క్రిష్‌ను ఎంత పొగిడినా తక్కువే.’ ఈ చిత్రానికి పనిచేసిన యూనిట్ మొత్తానికి ప్రత్యేక ధన్యవాదాలు తెలుపుతూ జై ఎన్టీఆర్.. జోహార్ హరిక్రిష్ణ నినాదాలతో ఆకట్టుకునే ప్రసంగం చేశారు ఎన్టీఆర్.

More Related Stories