English   

చిక్కుల్లో నటులు శరత్ కుమార్, రాధారవి...అరెస్ట్

Will Sarathkumar and Radha Ravi be arrested
2019-05-05 19:58:03

ప్రముఖ తమిళ నటులు శరత్ కుమార్, ఆయన బావ అయిన రాధారవి చుట్టూ ఉచ్చు బిగిస్తోంది హైకోర్టు. గతంలో నడిగర్ సంఘానికి అధ్యక్షుడు, సెక్రటరీలుగా ఉన్న శరత్ కుమార్, రాధారవి సంఘానికి సంబంధించిన స్థలాన్ని అక్రమంగా విక్రయించారని ప్రస్తుత నడిగర్ సంఘం జనరల్ సెక్రటరీ విశాల్ హైకోర్టును గతంలో ఆశ్రయించారు. నిజానికి కాంచీపురం జిల్లా వేదమంగళంలో నడిగర్ సంఘానికి చెందిన 26 సెంట్ల స్థలం ఉంది. 2006లో నడిగర్ సంఘం అధ్యక్ష పగ్గాలు చేపట్టిన నటుడు శరత్ కుమార్ ఇతర సభ్యులు రాధారవి, కేఆర్ సెల్వరాజ్, ఎంఎన్‌కే నటేసన్‌తో కలిసి ఈ స్థలాన్ని అమ్ముకున్నారనేది ప్రధాన ఆరోపణ. డాక్యుమెంట్లను ఫోర్జరీ చేసి థర్డ్ పార్టీ ద్వారా ఈ స్థలాన్ని విక్రయించారని విశాల్ పేర్కొన్నారు. ఈ విషయం సంఘంలోని ఇతర సభ్యులకు తెలియకుండా వీరంతా జాగ్రత్తపడ్డారని పిటిషనర్ వాదన. స్థలాన్ని ఎంతకు విక్రయించారో తెలియదు కానీ, ఈ విషయం 2016లో వెలుగులోకి రావడంతో కొత్తగా ఎన్నికైన జనరల్ సెక్రటరీ విశాల్ రంగంలోకి దిగారు.

వారికి షోకాజ్ నోటీసులు పంపారు. వారి స్పందన సంతృప్తికరంగా లేకపోవడంతో 2017 సెప్టెంబర్‌లో విశాల్ పోలీసులకు ఫిర్యాదు చేశారు. అక్కడ కూడా ఆయనకు సరయిన రెస్పాన్స్ రాకపోవడంతో కోర్టును ఆశ్రయించారు. దీనికి సంబంధించిన ఆధారాలు పక్కగా ఉంటే విశాల్ పోలీస్ స్టేషన్‌లో కేసు పెట్టొచ్చని కొన్ని నెలల క్రితం హైకోర్టు సూచించింది. దీంతో ఆయన కాంచీపురం పోలీసులకు ఫిర్యాదు చేశారు. తాజాగా విశాల్ పిటిషన్ మరోసారి హైకోర్టులో విచారణకు వచ్చింది. ఈ సందర్భంగా కేసు దర్యాప్తును ఆలస్యం చేస్తోన్న కాంచీపురం పోలీసులపై హైకోర్టు ఆగ్రహం వ్యక్తం చేసింది. మూడు నెలల్లోగా దర్యాప్తును పూర్తిచేసి, నిందితులను అరెస్టు చేయాలని హైకోర్టు ఆదేశించింది. దీంతో మూడు నెలల్లో ఏ విషయం అనేది తేలనుంది.
 

More Related Stories